गाओं में ओरा परे, खावे कछु बचौ नई, पेट भरन कों काम कछु चईये।
मोडाय संग लेर, मोडीय घर छोड़, काज की तलाश में शहर चले गइये।।
काम कछु मिलो नहीं, आथे को मांग खायो, सड़क किनारे सोय अब जइये।
मंत्री के छोरा ने, दारू को नशा कर, सोते भयेन पे गाड़ी चढ़ाय दइये।।1।।
जैसी ये खबर लगी, त्राहि त्राहि मच गई, मंत्री को छोरा 'सेफ' रैनो चईये।
महंगी ये गाड़ी ए, फॉरन ते मंगाईये, गाड़ी ये फटाफट सर्विस कूं जइये।।
मजूर को मोडा मरो, मरो भयो डरो रयो, मौको मुआयनों पैले होनो चईये।
मंत्रीए खबर लगी, एम्बुलेंस भेज दई, मंत्री की छवि तो साफ रैनी चईये।।2।।
मीडिया वारे आय गए, कैसो लगो पूछ रये, 'हिट एंड रन' को केस होनो चईये।
मजूरे कछु पतो नई, मोडा तो मर गयो, नींद वाकी सरकारी बेड पे खुल रईए।।
पुलिस अब आय गई, बयान लिख ले गई, संग वाके थोडो सो ज्ञान दे गईए।
मंत्री को छोराय, चुपचाप डरो रियो, नहीं तो मंत्री तेरे घर से उठा लईए।।3।।
मंत्री के गुर्गा आए, धमकी वमकी दे गए, मंत्री के छोरा को नाम नई चईये।
दो लाख रुपया, लेकर के चुप हैजा, वरना फिर तेरी जुबान खेंच लईए।।
मजूर फिर डर गयो, डरके वो कै रयो, गलती हमारे मोडा ते है गईए।
मोडाई हमारो, आगे आय सरको, गाड़ी तो अपने रस्ता रस्ता गईए।।4।।
एसपी फिर आय पौंचो, प्रेस कॉन्फ्रेंस कर दइ, गलती तो ड्राइवर पे ते है गईए।
मंत्री को छोरा तो, घर में सोय रयो, मंत्री के ड्राइवर ने गाड़ी चढ़ाय दईये।।
मीडिया को पैसा पौंचो, न्यूज फिर छप गई, मंत्री को छोरा दोषी अब नईए।
'हिट एंड रन' को, नाम पुरानो है गयो, 'हिट एंड धन' तो कहनी अब चईये।।5।।